கொஞ்சமும் பொருத்தமற்ற பதவிஅமர்த்தம்!
திருவாட்டி சுதா சேசையன் என்பார் தமிழ்நாட்டின் எம்.சி.ஆர் மருத்துவப்
பல்கலைக்கழகத்தின் துணைவேந்தராகவும் மருத்துவப் பேராசிரியராகவும் பணியாற்றி,
30 திசம்பர் 2022இல் பணிநிறைவு பெற்றவர். இவர் தமிழ் பத்திமை (ஆன்மிக)
இலக்கியங்களைப் பற்றிய மேடைப் பேச்சாளராகவும் பட்டிமன்றப் பேச்சாளராகவும்
இருப்பவர்.
இந்நிலையில் அண்மையில், திருவாட்டி சுதா சேசையன் செம்மொழித் தமிழ் உயராய்வு
நடுவத்தின் துணைத்தலைவராக அமர்த்தப்படுவதாகச் செய்தி வந்திருக்கிறது. இந்தப் பதவி
அமர்த்தம் இந்த நிறுவனத்தின் நோக்கங்களுக்கே முரணானதாக இருக்கிறது என்றநிலை மனம் கவலச்செய்வதாக
உள்ளது. இந் நிறுவனத்தின் தலைவரான தமிழ்நாட்டு முதலமைச்சரைக் கலந்துபேசி இந்த
அமர்த்த ஆணை பிறப்பிக்கப்பட்டுள்ளதா என்பது தெரியவில்லை.
திருவாட்டி சுதாசேசையன், தமிழின் செவ்வியல் இலக்கியங்களை முறையாகக் கற்றவரில்லை.
செவ்வியல் தமிழ் உயராய்வு நடுவத்தின் உயர்பொறுப்பிற்கு வருவோர், தமிழ்ச் செவ்வியல் இலக்கியங்களில் ஆழ்ந்த புலமையும், ஆராய்வு நுட்பமும், பரவலாக இதுவரை வந்துள்ள செவ்வியல் தமிழ்நூல் ஆய்வுகள்
எல்லாவற்றையும் பற்றிய அறிவும் பெற்றிருத்தல் இன்றியமையாத் தேவைகளாகும்.
நல்ல மருத்துவர் என்றோ, மருத்துவப் பல்கலைக்கழகத் துணைவேந்தராக இருந்தவர் என்பதாலோ, நன்றாகப் பத்தி இலக்கியச் சொற்பொழிவு செய்கிறார் என்னும் தகுதியிலோ
வேண்டியவர் என்ற அடிப்படையிலோ, உறவுக்காரர் என்ற தொடர்பிலோ, நம்மவர் என்ற எண்ணத்திலோ, அமர்த்தப்படும் பதவி செம்மொழித் தமிழாய்வு நடுவ நிறுவனத்
துணைத்தலைவர் பதவி இல்லை!
இவர், காசியில் பா.ச.க அரசு நடத்திய ‘சங்கமம்’ நிகழ்வினில் இந்தியிலும் தமிழிலும் தொகுப்புரை தந்தவராம்.
இந்திய நாடாளு மன்றக் கட்டடத் திறப்புவிழா நிகழ்ச்சியிலும் இவர் இந்தியிலும்
தமிழிலும் வண்ணனைத் தொகுப்புரை தந்தாராம். இவையும் கூட செம்மொழித் தமிழாய்வு நடுவ
நிறுவனத் துணைத்தலைவர் பதவிக்கான தகுதிகள் என்று எந்த அறிவாளியும் கூறார். சுதா சேசையன்
விகடன் குழுமத்தின் அறிதி (தகவல்) களஞ்சியத்தின் பதிப்பாசிரியராக இருந்தாராம். இது
எவ்வகையிலும் அண்மைப் பதவி அமர்த்தத்திற்கான தகுதியாக இருக்கமுடியாது. இவர்
பெற்றுள்ள “கேப்டன் சேசாத்திரிநாதன் பட்டம்“ எந்தவகையும்
இந்தப் பதவி அமர்த்தத்திற்குத் தொடர்புடையதன்று.
கொஞ்சம்கூட பொருத்தமற்ற இப்பதவி அமர்த்தத்தை ‘நற்றமிழ்’ கடுமையாகக் கண்டிக்கின்றது. இந்தப் பதவி அமர்த்தம் உண்மையான
தமிழறிஞர்களையும் தமிழ் ஆய்வாளர்களையும் இழிவுபடுத்தும் செயலாக ‘நற்றமிழ்‘
கருதுகின்றது. உடனே இப்பதவி அமர்த்த ஆணையைத் திரும்பப்பெற வேண்டுமென்றும் தகுதியான
தமிழாய்வறிஞர் ஒருவரைத் தேர்ந்து அமர்த்தம் செய்யவேண்டுமெனவும் இந்திய ஒன்றியஅரசை ‘நற்றமிழ்’ வலியுறுத்துகின்றது.
இதனை இதனால் இவன்முடிக்கு
மென்றாய்ந்து
அதனை அவன்கண் விடல். – கு.517.
(புதுவை 'நற்றமிழ்' செபுதம்பர் -அக்குதோபர் 2024 இதழில் வந்தது)
கருத்துகள் இல்லை:
கருத்துரையிடுக