மாவீரர் நாள்
தாய்நாட்டின் விடுதலைக்குத் தம்முயிரை ஈந்தோர்
தகுநினைவு கூர்ந்தவரை வணங்கிடுநாள் அன்றே
ஏய்ந்தமைய அழைக்கின்ற மாவீரர் நாளாம்!
ஏனையபல் நாட்டாரும் நினைந்திடுமோர் நாளாய்
வாய்தலுற குறிப்பிடுவர் வணங்கிடுவர் அன்றே!
வாயார அவர்புகழை வழுத்திமகிழ் வாரே!
ஓய்வறியாத் தலைவரந்நாள் உள்ளபல செய்தி
ஓர்ந்தறிய விளக்கிடுநல் லுரையாற்று வாரே!
ஈழத்தில் நவம்பரிலே இருபத்தி ஏழில்
ஈகியரை நினைந்துருகி இரங்குகின்ற நாளே!
ஆழமென உணர்வுறைசத் தியநாதன் சங்கர்
அவர்தலைவர் மடியினிலே உயிர்நீத்த நாளே!
காழமுறு தமிழீழம் காணுகின்ற கொள்கைக்
கணந்தோறும் நெஞ்சிருக்கக் களத்துயிரீந் தோரைச்
சூழலுற உறவுசுற்றம் சோர்ந்துவணங் கும்நாள்!
தூயீகி யர்நினைப்பில் தோய்கின்ற நாளே!
மாற்றமின்றி வழிபடுநல் மனமும்பெற் றாரே!
சற்றும்வேற் றுமையின்றிச் சமமாக எண்ணிச்
சமைவுறவே புலிகளெலாம் சார்புகரு தாரே!
உற்றார்மா வீரர்நாள் ஊர்தோறும் போற்றி
உறுநினைவில் கடைப்பிடித்தல் உண்டென்ற போதும்
மற்றுகிளி நொச்சியிலே கனகபுரம் தன்னில்
மாவீரர் துயிலிடத்து மாபெருநி கழ்வாம்!
மணியோசை நினைவமைதி மாச்சுடரை ஏற்றல்
மனமுருக வணங்கிடுதல் மாத்துயரில் மாழ்கல்!
துணிவார்ந்த புலித்தலைவர் துலக்கவுரை செய்தல்!
தொடர்ந்துவந்த இறுதிப்போர் துன்பத்தின் பின்னே
பணிந்தமனத் தோடுருகி பற்பலமா வீரர்
பரிவார்ந்த உறவெல்லாம் படையலிட்டு விம்மல்
பிணிப்புற்று மனங்கலங்கிப் பேதுறவே வைக்கும்!
பிற்றையெவர் வருவாரோ பெருந்துயரை மாற்ற!
